خلطة بانيه

اى بواقى عيش فينو بايت عندك واتعودى دايما لما يتبقى الفينو تلفيه فى فوطة وتحطيه فى كيس علشان مينشفش اوى ويفضل محافظ على طراوته او تشليه فى الفريزر لحد ما تجمعى كمية كويسة والعيش اللى عندى انا طحنته وهو لسة طرى شوية وطحنته مش ناعم اوى ولو عوزة تنعميه حاقولك بس كمان شوية بس مبدئيا اطحنيه خشن شوية فى مطحنة الخلاط وكل ما كان العيش طرى شويةكل ما كان افضل
مكعب مرقة دجاج
هاتى تمن معلقة من التوابل اللى حاقولك عليها فلفل اسود
حبهان
روز مارى
قرنفل
زعتر
جنزبيل
كمون
اى توابل او اعشاب عندك حطيها بمقدار تمن معلقة مش عاوزين التتبيلة تبقى كتير اوى والفراخ طعمها يبان برضو
معلقة صغيرة ملح
ولو عاوزاها مشطشطة حطى شطة بس لو فيه ولاد خليها سادة وانت بتحمرى اعملى زى ما انا بعمل بتبل مناب الولادوبحمره وبعدين المناب بتاعنا احنا بزوده شطة واحمره فى الاخر علشان الزيت الى بقلى فيه ميكونش اخد طعم الشطة وانا بقلى فى زيت ذرة مع معلقة زبدة فلاحى بعملها فى البيت نشوف الطريقة بقى
حتسخنى الفرن على اعلى درجة حرارة عندك وتسيبيه10 دقايق وبعدين تطفيه تكونى حطة العيش المتقطع فى المطحنة وتطحنيه بس مش ناعم اوى وحطيه فى صينية ودخليه الفرن وسيبيه لحد ما ياخد حرارة الفرن ويبرد تخلطى كل التوابل سوا مع الملح ومرقة الدجاج وتحطى التوابل على العيش وتقلبى وتعبى فى برطمان الخلطة مش بتبقى ناعمة اوى لا بتبقى زى حبيبات الكسكسى وانا بحبها كده لانى لما بحمر فيها الفراخ بتبقى مقرمشة ولو عاوزاها زى اللى بتتباع برة اطحنيها تانى فى المطحنة والصراحة الخلطة دى انا مش بغيرها فى عمل البانيه واحسن من اللى بتتباع برة فى اكياس اللى يا دوب الكيس يكفى 3 حتت بانيه واللى عند العطار بحس ان العيش ريحته مزنخةسورى دى اضمن واوفر تبلى بقى الفراخ بالملح والفلفل وغطيها بالدقيق وبعدين البيض المضروب واخيرا بالخلطة بتاعتنا وسيبيها فى التلاجة تتماسك شوية وعلى فكرة انا بتبل البانيه واشيله فى علبة بلاستك وبين كل طبقة بحط ورق بلاستك فلم اللى بيغلفوا بيه الجبن والحلاوة ده يارب تعجبكم متبخلوش عليا بدعوة حلوة بصلاح الاحوال وربنا يبارك لى فى ولادى ويهديهم

سلمت يداكى يا قمر